Idees oor hoe om WhatsApp/Moyo-ondersteuningsgroepe te bestuur

Indien jy weet van ’n groep mense wat in die gemeenskapsondersteuningsruimte werk, of jy is ’n saamsnoerder (of ondersteun ’n saamsnoerder) wat by gemeenskapsorgwerkers betrokke is, is een maklike maar belangrike manier om #BeThere te wees, om ’n Gemaskerde Helde-portuurondersteuningsplatform op WhatsApp/Moyo (’n gratis, plaaslike kletsdiens) te skep en te koester.

Spring weg: Stuur ’n privaat boodskap aan elke individuele gemeenskapsorgwerker (GSW) wat jy graag wil uitnooi om by die groep aan te sluit. Voordat jy hulle by enige groep byvoeg, vra eers of hulle deel wil word. In daardie boodskap behoort jy te verduidelik wat die doel van die groep is en wat van hulle verwag sal word. As dit maklik is, kan jy selfs die teks hieronder uitknip en in daardie boodskap inplak om dinge aan die gang te kry:

Hallo daar! Ek hoop dit gaan goed met jou. Ek het jou nommer by _______ (voeg ontbrekende inligting in) gekry. Ek weet dinge is dalk regtig moeilik vir jou en jou kollegas tydens hierdie pandemie. Ek wou jou net laat weet dat ek ’n virtuele ondersteuningsgroep op WhatsApp/Moyo gaan begin. Daar is geen druk op jou om deel te neem nie – maar natuurlik is dit ook ’n ruimte waar jy kontak kan maak met ander mense wat dalk dieselfde dinge ervaar. Jy kan die groep enige tyd verlaat as jy wil – en ek sal geen vrae vra nie! Laat my asseblief weet of dit in orde sal wees as ek jou by die groep byvoeg. Van _________ (jou naam)

As hulle jou dan laat weet dat hulle wil deel word van die groep – wonderlik – voeg hulle by die groep! Indien nie, moenie hulle laat sleg voel daaroor nie. Laat hulle weet dat dit geensins ’n probleem is as hulle in ’n later stadium van plan verander nie en dat hulle welkom sal wees om aan te sluit.

Skep die groep. Onthou, wanneer jy ook al nuwe mense byvoeg, kan hulle nie boodskappe sien wat gedeel is voordat hulle aangesluit het nie, en daarom kan dit dalk sin maak om ’n verwelkomingsboodskap te hê wat jy elke keer uitknip en inplak wanneer ’n nuwe persoon by die groep aansluit. Jy kan iets in dier voege insluit:

Welkom by die ________ (naam van die area) Gemaskerde Helde-ondersteuningsgroep. Dit is ’n informele ruimte waar ons mekaar kan besiel in hierdie moeilike tye. Om na mekaar om te sien, is daar ’n paar basiese riglyne wat almal moet volg:

Respekteer mekaar se privaatheid. Wat in die groep gebeur, bly in die groep!
Hierdie groep se fokus is die ondersteuning van gemeenskapsorgwerkers gedurende die COVID-19-pandemie. Moet asseblief nie enigiets deel wat nie daarmee verband hou nie.
Moet asseblief nie vreesaanjaende statistieke en nuusberigte deel nie. Ons kry genoeg daarvan in ons werk.
Deel asseblief jou eie ervarings, gedagtes en gevoelens.
Daar is geen druk op jou om te reageer nie en jy kan die groep enige tyd verlaat.

Dit is nie altyd maklik om vir ons vriende en familie te sê wat gebeur nie, en hierdie werk kan jou by tye baie geïsoleerd laat voel. Hierdie groep gaan dit nie oplos nie, maar ek hoop dit sal jou ’n gevoel van gemeenskap, kameraderie en vriendskap gee, en jou help onthou dat jy nie alleen is nie.

Daar is ook ander hulpbronne wat spesifiek ontwerp is om JOU te ondersteun by maskedheroes.org.za. Of WhatsApp “hi” na 060 011 9999.

Hou dit lewendig: Hierdie werk kom dalk vir jou natuurlik, maar indien nie, lees verder! Onthou, die doel van hierdie groep is om gemeenskapsorgwerkers te help om kop bo water te hou. Jy kan dit doen deur die volgende te doen:

Vra mense om hul “rose en dorings” van die dae (goeie en slegte dinge wat gebeur het) te deel.
Deel inspirerende stories op platforms soos www.sagoodnews.co.za, www.goodthingsguy.com, #ImStaying.
Deel inspirerende aanhalings en “memes” op platforms soos Inspirational caregiver quotes en Quotes about being kind.
Deel van die inhoud wat spesifiek vir gemeenskapsorgwerkers ontwikkel is op die Gemaskerde Helde-webwerf: Managing your health/ en Psychological Support
Moedig hulle aan om twee minute te neem om in stilte te dink en die emosies te noem wat hulle ervaar. Hulle hoef nie detail te gee nie. Hulle kan eenvoudig sê: “Ek voel hartseer”, of “Ek voel of dinge buite beheer is” of watter emosie dit ook al mag wees. Hulle kan dit neerskryf of met die groep deel.
Vra mense, wanneer die groep al ’n rukkie aan die gang is, om dit wat hulle van mekaar waardeer, te deel.
Moedig mense aan om oor hul ervarings te skryf. Hulle kan ook hul stories, in enige taal wat hulle verkies, hier deel. Jy kan ook stories van ander GSW’s hier met hulle deel: Stories from the frontline

En onthou:

Niemand verwag van jou om oornag ’n professionele sielkundige te word nie. Dit is nie waaroor hierdie platform gaan nie. Indien baie moeilike kwessies geopper word wat jy nie gekwalifiseer is om te hanteer nie, maak asseblief seker dat jy die GSW na iemand verwys wat hulle kan help. Klik hier vir meer hulpbronne om GSW’s te help om kop bo water te hou en om kontakbesonderhede van Lifeline en die SA Depressie- en Angsgroep te kry.
Dit is ook belangrik dat jy jou eie geestesgesondheid beskerm. Moenie meer gee as wat jy kan bestuur of kan hanteer nie. Wees ook goed vir jouself en vir die GSW’s.
As jy vind dat die gesprek baie moeilik word om te hanteer, kan jy vriende uitnooi om jou te help om die las te dra. Die punt is egter om #BeThere te wees vir GSW’s – en nie om GSW’s met ’n duisend boodskappe te bombardeer nie. Dit is genoeg om elke paar dae uit te reik om ’n pragtige meem, ’n inspirerende aanhaling, ’n bemoedigende storie te deel of ’n gesprek te fasiliteer.
Indien belangrike stories opduik wat jy dink gedeel behoort te word (met toestemming van die persoon wie se storie dit is), skryf aan ons by info@maskedheroes.co.za, of deel die storie op sosiale media deur die #MaskedHeroesSA en #BeThere-hutsmerke te gebruik.